حسّيت بشي مش طبيعي بصدري، فرحت عند الحكيم واكتشفت إنّه مرض خبيث.

قمنا على شو خبرية، إنُّه بدّن يفوتوا يقتحموا النبعة ويدبحوا العالم.

بعلمي ما في شي، بس إمشي عالطريق تنزل القذيفة يا قدّامي يا ورايي.  

الشمس ما توصل لعنّا، وصوت الطيران والقنابل هوّي الوحيد اللّي نسمعُه.

كنت دقّ الكبة عالبلاطة، وتجي جارتي الأرمنيّة تقلّي: شو طيّب الأكل من تحت ديّاتِك.

كنا نضوّي الشمع، وأوقات نخاف نضوّي شمعة مشان ما يقصفونا.

كان بيتنا عا خطوط التماس. ومن ورا الحرب انتقلنا عا منطقة غير لنعيش فيها.

بقبرص الحياة حلوة، والولاد مبسوطين، كلّن بالمدارس، اضطرّينا نحطّن بالمدارس عا أساس إنّن بيتسلّوا شوي.

أقسى شي عاشته عيلتي كان فقدان خيّي اللّي مات بسبب القصف، وهالشي ولا يمكن يتعوّض

أزمات بنزين، أزمات غاز، ويصير في احتكار وغلا بالأسعار، بس كان في مصاري مع العالم.

جاري المسلم اهتمّ ببيتي، وقفّل البواب لمّا حاول الحراميّة يسرقوا بيتي.

صار وجّي أصفر، فا عملتلي مكياج عشان الأحزاب اللّي عاملين حواجز ما يشوفوني خايفة.

ولا مرّة أثّرت الحرب على علاقاتنا مع أصحابنا يللّي عالميلة التانية من خطّ التّماس.

قلّي: في عندكن عميل هون. وبلّش واحد منّن ينبّش بالخزانة والجوارير. 

كلّ الشعب انقسم لطوائف وأحزاب وأنا منّن. يعني أنا فتت بحزب.